Wednesday, September 26, 2018

හුදෙකලා වලාකුළක්ව...


වලාකුළක් වී හුදෙකලාවෙම
ඉබාගාතේ ඔහේ පාවෙමි
කඳු හෙල්  මහ නිම්න අද්දර
සැලෙන කහවන් කුසුම් නරඹමි
විසල් විල්තෙර තුරු මුදුන් යට
පවනෙ නැළවෙන කුසුම් දකිනෙමි

සියක් දහසක් එකම තාලෙට
පවනෙ නැළවෙන සැටි දකින්නෙමි
අනන්තය තෙක් නිමක් නොම වී
 මල් පිපි හැඩ බලා ඉන්නෙමි
අහස් ගඟුලේ දිස්න දෙන පොඩි
තාරුකා කැට සිහි කරන්නෙමි

පියුම් යායේ තනුව කැටිකර
දිස්න දෙන දිය රැළි බලා ඉමි
කුමන කවියාද එවන් දසුනට
සිතින් මත් නොම වෙන්නෙ සිතනෙමි
ඉතින් නිම් නැති වටින ධනයක්
ලෙසින්  දෙස බලා සිටිනෙමි

දිනෙක නොනිදා අවදියෙන් මා
කල්පනාවෙන් බරව යනු ඇති
එදින යළි මම අසනි සැරයෙන්
මෙකී මොහොතට නැවත පැමිණෙමි
හද අරක් ගත් හුදෙකලාවට
සතුටු සුසුමක් සෙමින් පිඹීනෙමි
සුසුම් සරයේ නදට යාවී
 මල් හා ගී ගයා සැනසෙමි

William Wordsworth කවියාගේ I Wandered Lonely as a Cloud හී සිංහල අනුවාදයකි.
බුද්ධි ප්‍රබෝධ කරුණාරත්න.
26.09.2018

2 comments:

මලක් හරි ගලක් හරි දමල ගහල යන්න, ඒක මට හයියක්.

Related Posts Plugin for WordPress, Blogger...