Saturday, June 13, 2015

ඇයි ද මෙතරම් සුසුදු සියපත්?

සයිබරයට මුදා හැර නිදහස්වනු පිණිස තබන සටහන්

".....ගඟ පැත්තෙන් පඩි පෙළ නැග....."
සේයාරුව Daily News

දෑවුරුද්දකට පමණ පෙර මිත්‍රයෙකුගේ පොතක එලි දැක්වීමක් නිසා ගම්පහ ඔහුගේ නිවසේ බර සාකච්ඡාවක සිටි මොහොතක ලැබුන කෙටි පණිවිඩයක්..

"අද හවස කැළණි පන්සල් යමු(ද)"

ඉතිං වැඩ පැත්තක තියලා, හවස් වෙද්දී මම බස් එකක නැගලා කැළණි විහාරෙට ආවා..

මම ටිකක් පරක්කුයි, බස් නැවතුම්පොලෙන් බැහැලා කැළණි ගඟ පැත්තෙන් ඇවිත් පඩිපෙළ දිගේ නැගලා, වෙහෙර මලුව උඩට ඇවිත් මම වට පිට බැලුවා, ඒ වෙද්දී ඈ එතන වග දැනගෙන උන්න නිසා..

මම ගඟ පැත්තෙන් ආවට මොකද, අනිත් පැත්තේ බස් පාර දිහාවට එබීගෙන, වෙහෙර මලුව කෙලවර පවුරට බර වෙලා ඈ ඉන්නවා..

සුදුම සුදු පාට දිගම දිග  සාය,  

සුදුම සුදු පාට අත් දෙකටම දිග බ්ලවුස් එක,

තවමත් ලාවට තෙත බරිත කඩා දාපු කොන්ඩේ, 

රතු පාට අත් බෑගය,

සුදු පාට නෙලුම් මල් කළඹක් පපුවට තද කරගත් ඇය!


සුදුම සුදු පාට සුසුදු දසුනක්!


මට පිටු පාලා ඈ උන්නු ඈ ලඟට ගිහින් කතා කරන්න කලින්, මොහොතකට මගේ ගමන නැවතුනා කියලා ඈ අදටත් දන්නේ නැතුව ඇති. 

අදටත් ඈව වැඩිපුරම ලස්සනට දැකපු දවස, ඉතිං එදා ගෙදර ඇවිත් කොහොම මෙහෙම නොලියා ඉන්න ද?


කොහොමද මේ මල් සුදු පාට වුණේ? 
පහු ගිය ආත්මෙක මේ වගේ මං එනකං මග බලාගෙන නෙලුම් මල් තුරුළු කරගෙන උන්නු මොහොතක, ඈටත් හොරෙන් ඒ මල් ඇගේ පාට හොරකම් කරන්න ඇති.

ඉතිං මේ, ඒ හොරකමේ කතාවයි!



පැහැසර අහස නිල්වන් බැල්මෙන් දිලෙනා
රූ සර වත කමල සිත දුරගෙනයන්නා
පුරව ර කැළණි කොත රන් පාටින්දිලෙනා
පිනිබ ර උදේ ඇගෙ ඇරයුම පිළිගන්නා
  
උදයේ ඉරට හිනැහුණ සියපත්යායේ
පියුමන් දෝත පුරවා පේවී ආයේ
පිණිවට සුදු නෙලුම් රැඳී කැලුමන්ආයේ
ඇගෙ මුවෙ පැහැය කෙලෙසද නොදැනීලැබුයේ
  
පෙර අත් බවෙක පුරවා හද බැතිපැතු මන්
පෙර මං බලා ඉන්නට ඇති තුටු සිතු මන්
පුර වා දෝත සියපත් ලය මතහැඟු මන්
සොර සේ ගන්න ඇති වත පැහැ ඒපියු මන්
  
මිදුණු වරල උර මත නිල්ලෙන්දිලෙනා
සුසුදු දසුන බැතිබර හැඟුමෙන්පිරෙනා
වෙහෙස බල බලා මහ මග දෙසඑබෙනා
වෙහෙර මලුව උඩ ඈ තනියමඋන්නා
  
දේවි උලකුඩය පැතුමෙන් දරුදුකින
එවී විභීෂණ දෙවි වෙතසැළලිහිණ
පිය ඹා හසුන කැලණි පුරට ආසැටින
මෙපුර පුදට ආවේ අද අපදෙදෙන
  
පුදින කුසුම් හද පැතුමන් සුවඳගෙනේ
ජිවන ඔරුව සිඳු ගැඹුරට ඇදෙනුදැනේ
සැඩ රල පෙරලි පෙරලී නීති විඩාගෙනේ
විරිය දෙන්න අප දෑතටස්වාමිනේ
  



කවියේ අලයිමන්ට් හදාගන්න උදව් වුන 'අලුත් මල්ලි'ගේ ගැජට් එකට ගොඩක් ස්තුතියි. මෙන්න කවි ටික නයා ගියා වගේ නැතුව එළිසමය මතු වෙන්න ලස්සනට දාන්න පුළුවන් නියම ගැජට් එකක්, සිව්පද.

3 comments:

  1. හරිම ලස්සනයි බන්..

    කවියෙක්ට පෙම්වතියක් වෙන ඒක මොනතරම් සුන්දර හැගීමක් වෙනවා ඇත් ද ?

    ReplyDelete
    Replies
    1. ස්තුතියත් එක්කම, ඔන්න මේ කමෙන්ට් එකේ උත්තරේට වෙනම පෝස්ට් එකක් ලිව්වා!

      Delete
    2. http://karuugesithroo.blogspot.com/2015/06/blog-post_39.html

      Delete

මලක් හරි ගලක් හරි දමල ගහල යන්න, ඒක මට හයියක්.

Related Posts Plugin for WordPress, Blogger...